வீரர்குல பண்டிகையாம் தைப்பொங்கலே - நீயும்
வருந்தும்படி எமதுவாழ்க்கை மாறியதை நீயறிய
வரிசையிட்டுக் கூறுகின்றேன் வெள்ளைப் பொங்கலே! (1)
வயிறார உண்பதற்கும் வக்கில்லா நிலைமையிலே
விவசாயி இன்றுள்ளான் தைப்பொங்கலே – அவன்
பயிர்வளர்த்த இடங்களிலே பாதியிடம் கட்டிடமாய்
பணக்காரன் ஆக்கிவிட்டான் பானைப் பொங்கலே!.....(2)
விடுபட்ட இடத்தினிலே விதைவிதைத்து ஓய்ந்தபின்னே
வளர்த்திடத்தான் நீரில்லை தைப்பொங்கலே – அதை
விடுவதற்கு நீதிமன்றம் ஆணையிட்ட பின்னாலும்
விடமாட்டேன் என்கின்றான் வாகைப் பொங்கலே!.....(3)
கொஞ்நஞ்ச இடத்தினிலே கரும்புமஞ்சள் பயிர்செய்து
வாஞ்சையோடு வருடிவிட்டால் தைப்பொங்கலே – அந்த
மஞ்சளெல்லாம் மருத்துவத்தின் தேவைக்காக வேண்டுமென்று
வெளிநாட்டான் வாங்குகிறான் வீரப் பொங்கலே!.......(4)
நாட்டிலுள்ள பயிர்நிலங்கள் நாகரீக வளர்ச்சியிலே
நகரமாகிப் போனதுவே தைப்பொங்கலே - இப்போ
காட்டினிலே பாத்திகட்டிப் பயிவளர்க்கும அவலத்தினை
கர்வத்தோடு செய்கின்றான் கன்னிப் பொங்கலே ....(5)
காட்டுயானை ஓடிவந்து கரும்பிட்ட தோட்டத்திலே
கதகளிதான் ஆடுதையோ தைப்பொங்கலே – நாம்
காட்டினிலே பயிர்வளர்த்து பணம்செய்யும் செயலையது
கண்டுமனம் கொதிக்கிறதே கரும்புப் பொங்கலே! ....(6)
கதகளிக்குத் தப்பிவந்த கரும்பெல்லாம் சூளையிலே
கட்டுக்கட்டாய் எரிகிறதே தைப்பொங்கலே – அந்தப்
பதமான கரும்பிற்குப் பாதிவிலை கூடஇல்லை
பாரதத்தில் இந்தநிலை பருவப் பொங்கலே!.....(7)
வருமானம் இல்லாமல் விவசாயக் கடனுக்கு
வட்டிகட்ட ஏலவில்லை தைப்பொங்கலே – பாதி
விவசாயி மனமொடிந்து விசமருந்திச் சாகின்றான்
விளங்கிடுமா இவ்வுலகம் வெண்ணைப் பொங்கலே…..(8)
கேணியிலே நீரில்லை தூர்வாரப் பணமில்லை
கழனிக்கும் உரமில்லை தைப்பொங்கலே - இங்கு
மாணியம் கொடுத்தாலும் மின்சாரம் காணாமல்
மயங்கித்தான் விழுகின்றான் மாயப் பொங்கலே!.......(9)
சேற்றினிலே கால்வைத்து சோறுபோட்ட உழவனைத்தான்
தேற்றிவிட யாருமில்லை தைப்பொங்கலே – அவன்
ஏர்க்கலப்பை எல்லாமே துருப்பிடித்து போனதினால்
ஊர்நிலங்கள் வெடிக்கிறது வெற்றிப் பொங்கலே!.....(10)
தோரணமாய்க் கட்டிவைக்கத் துண்டுமஞ்சள் கரும்பின்றித்
தோள்துவண்டு போகின்றோம் திருப்பொங்கலே - நமது
திருநாட்டின் நிலைமையின்றுத் தலைகீழாய் போனதினால்
தித்திப்பாய் இருக்கவில்லை இத்தமிழர் பொங்கலே!....(11)
கருத்துகள் இல்லை:
கருத்துரையிடுக