நாளைக்குப் பூக்கிறது ரோஜா...!

ஆசையாக வளர்த்த ரோஜா செடியில்
எனக்குப் பிடித்த  ரோசாப்பூ...
மொட்டு விட்டிருக்கிறது

நாளைக்குப் பூத்துவிடும் ....

நாளை கல்லூரிக்குச் செல்லும்போது
தலையில் வைத்துக்கொண்டு செல்லவேண்டும்...
அக்கா முடிவெடுத்துவிட்டாள்

காலையில் அம்மனுக்கு
இந்த ரோசாப்பூ வைத்து  பூஜை செய்ய  வேண்டும்...
அம்மா நினைத்துக்கொண்டிருக்கிறாள்

நாளை தன் காதலிக்கு
இந்த ஒற்றை ரோசாவைப் பரிசாகக் கொடுக்க வேண்டும் ...
தம்பியும் யோசித்துக்கொண்டிருக்கிறான்

இந்தப்பூவில் தேன் குடிக்க ஆசைப்பட்டு  
நேற்றுமுதல் அந்த மொட்டைச் சுற்றியே
வட்டமிட்டுக்கொண்டிருக்கிறது ஒரு வண்டு

ஆனால்..

அழகையும்-
நறுமணத்தையும்
தேன் துளிகளையும்
அடிவயிற்றில் சுமந்து கொண்டு ----

இரவெல்லாம் பிரசவ வேதனையில்
முனகிக்கொண்டிருக்கும்போதும்

இந்த யாரோ ஒருவரால் -நாளை
தன்னுடைய மரணம்
நிச்சயிக்கப்பட்டு விட்டதென்பதை அறியாமலே
இதழ்விரிக்கக் காத்திருக்கிறது அந்த ரோசாப்பூ...