என்னைப் பற்றி

எனது படம்
"ஆசி"ரியருக்கு மகளாகப் பிறக்கும் "ஆசி" பெற்றவள். ஆர்க்காடு நகரத்தில் ஆரம்பக் கல்வி பெற்றவள், மற்ற வலைத்தளங்களில் "யாதுமானவள்" என்ற புனைப்பெயரில் எழுதுகிறேன்.

செவ்வாய், 2 அக்டோபர், 2018

தமிழகத்தில் அகோரிகள்; வலுவிழந்துவிட்டதா திராவிடர் கழகம்?

தந்தை பெரியாரால் பாதுகாக்கப்பட்டுவந்த தமிழகத்தில் இன்று அகோரிகள் சிறப்புப் பூஜை செய்து பிணத்தைப் புதைக்கும் அளவிற்கு  வளர்த்திருக்கிறார்கள் என்ற செய்தி மிகவும் அதிர்ச்சிகரமானதாகவும் ஆபத்தானதாகவும் தோன்றுகிறது. 

சடங்கு சம்பிரதாயங்கள் என்ற போர்வையில் மூடநம்பிக்கைகளை விதைத்துக் கொண்டிருந்த வந்தேறிகளின் சூழ்ச்சியால் பல நூற்றாண்டுகளாக இருளில் மூழ்கிக்கிடந்த தமிழகத்தில், பெரியார் என்ற ஒரு மாமனிதனின் முயற்சியும், ஒத்த கருத்துள்ள பல லட்சக்கணக்கான தொண்டர்களின்  கடும் உழைப்பும், மக்களை மூடநம்பிக்கைகளிலிருந்து  மெல்ல விலக்கி சுயசிந்தனை உள்ளவர்களாகவும் சுயமரியாதை உள்ளவர்களாகவும் மாற்றி வந்திருக்கிறது. 

ஆனால், தந்தை பெரியாரின் மறைவுக்குப் பிறகு, குறிப்பாக கடந்த 30 ஆண்டுகளில்  பெரியாரியம் தமிழகத்தில் மட்டுப்பட்டுதான்  இருந்தது என்பதை சுட்டிக்காட்டியே தீரவேண்டும். 

திமுகவின் ஆதரவுக் கரங்களாக மட்டுமே செயல்பட்டுக் கொண்டு பெரியாரின் கருத்துக்களை, பெரியாரை, இளைய தலைமுறைக்கு கொண்டு சேர்ப்பதில் பின்தங்கித்தான் இருந்தது தி. க. என்பது கசப்பான  உண்மை 

உலகளாவிய நிலையில் பெரியார் பரவுகிறார் என்பது உண்மையென்றாலும், தற்காலத்தில், அதன் முக்கியக் காரணமாக இருப்பது சமூக வலைத்தளங்கள் தான் . இந்த  இன்டர்நெட் காலத்தில் சமூக வலைத்தளங்கள் மூலமாக, தந்தை பெரியாரை மக்களிடத்தில் பரவலாகக் கொண்டு சேர்ப்பதில் அக்கறையுள்ள தொண்டர்களின் தொடர் பதிவுகளும், பதில்களும்தான் பெரியாரை பெருமளவில் இளைய தலைமுறையினரிடம் கொண்டு சேர்க்கிறது. மற்றபடி, விடுதலை நாளிதழ்களை படித்துவிட்டோ, அல்லது, கழகங்கள் தங்களுக்குள் நடத்திக்கொள்ளும் கூட்டங்களினால் மட்டுமே  அல்ல என்பதையும் நாம் உணரவேண்டும். 

உண்மைதான், கழகத் தோழர்களே பார்வையாளர்களாக, கழகத் தோழர்களே பேச்சாளர்களாக தங்களுக்குள்ளாகவே பேசிப் "பிரிந்த" கூட்டங்கள்தான் அநேகமாக நடந்துகொண்டிருக்கிறது.  அதனால்தான், 
கருத்து வேறுபாட்டினாலும் , செயல் வேறுபாட்டினாலும் திராவிட கழகம் பல கிளைகளாகப் பிரிந்து வலுவிழந்து விட்டதே என்று உண்மையான பெரியார் தொண்டர்கள் வேதனைப்பட்டுக்கொண்டு இருக்கிறார்கள். 

இன்னும் வெளிப்படையாகச் சொல்ல வேண்டுமென்றால், திராவிடர் கழகம் ஒரு கார்ப்பரேட் கம்பெனி போல் செயல்பட்டுக்கொண்டிருக்கிறது என்றே பரவலாகப் பேசப்பட்டு வருகிறது. சில செயல்களைப் பார்க்கும்போதும், இக்கூற்று உண்மைதானோ, கொள்கையற்றோர் உலவிக்கொண்டிருக்கும் கூடாரமாக மாறி வருகிறதோ பெரியார் திடல் என்ற அச்சமும் ஏற்படுகிறது. 
 
இதுவரை பெரியார் சிலைகளை அவமானப்படுத்துவதும் பெரியாரை தரக்குறைவாகப் பேசுவதையும் வாடிக்கையாகக் கொண்டிருந்தன  இந்துத்துவ அமைப்புக்கள். 

இப்போதோ , தமிழர்களைச் சுட்டுக் தின்பதற்கு அகோரிகள் தயாராகி வருகிறார்கள் என்பதற்கான முன்னோட்டமாகத்தான்  நேற்று, திருச்சியில் நடந்த சுடுகாட்டுச் சம்பவத்தைப் பார்க்க முடிகிறது. அதே நேரத்தில், இதுபோன்ற சம்பவங்கள் தொடர்ந்து நடக்குமெனில், தமிழகத்தின் அரணாக திராவிடர் கழகம் இருக்கிறது என்ற நம்பிக்கையை மக்கள் இழந்து விடுவார்களோ என்ற அச்சத்தையும்  ஏற்படுத்துகிறது.  

திருச்சியில், இந்த ஆண்டு ஜனவரி மாதம், கால பைரவர் சிலையை பிரதிஷ்டை செய்து சிறப்புப் பூஜை செய்ய  இந்தியாவின் பல்வேறு பகுதிகளிலிருந்து திரண்டு வந்த அகோரிகளை கண்டும் காணாமல் விட்டதன் அகோர  வளர்ச்சியே நேற்று பிணத்தின்மேல் அமர்ந்து அகோரிகள் நடத்திய சடங்கு. 

உண்மையிலேயே, அந்தச் செய்தியைக் கேட்கும்போதும், காணொளியைப் பார்க்கும் போதும் தி க இதுபோன்ற செயல்களை எப்படித் தடுக்கப்போகிறது  என்ற கேள்வி எல்லோர் மனத்திலு
ம் எழுவதைத் தவிர்க்க முடியவில்லை? 


- லதாராணி பூங்காவனம்  

புதன், 12 செப்டம்பர், 2018

பிள்ளையார் சுழியான சோதனை எழுத்தும் மஹா பெரியவாளின் கற்பனை விருந்தும்

பண்டைய காலத்தில் இலக்கியங்கள் வாய்மொழியாகச் சொல்லப்பட்டிருந்தது. 
அதாவது ஓலைச்சுவடியில் எழுத ஆரம்பிக்கும் முன், 
ஆசிரியர்கள் வாய் மொழியாகத் தான் மாணவர்களுக்குப் பாடம் சொல்லுவார்.  அதைக் கேட்டு மனத்தில் நிறுத்தி மனப்பாடம் செய்து தேர்ச்சி பெற்றவர்கள், பின்னாளில் அடுத்த மாணவருக்குத் தான் கற்றதை வாய்மொழியாகவே கற்பிப்பார். இப்படித்தான் இலக்கியங்கள் வழி வழியாக வளர்க்கப்பட்டு வந்தது.  

“நக்கீரர்,  தன்னுடைய மகன்  கீரங்கொற்றனாருக்கு களவியல் உரையைத் வாய்மொழியாக உரைத்ததையும்,  கீரங்கொற்றனார் தேனூர் கிழாருக்கு உரைத்ததையும் நாம் படித்திருக்கிறோம்.

இப்படி, வாய்மொழி இலக்கியத்தின் அடுத்த கட்டமாக இலக்கியங்களை ஓலைச் சுவடிகளில் எழுதினார்கள். அதற்கு பெரும்பாலும்  பனையோலைகளே பயன்படுத்தப்பட்டன. 
இளம் இலையாகவும் இல்லாமல் முற்றிய இலையாகவும் இல்லாத பனை ஓலைகளைத் தேர்ந்தெடுத்து, அதைத் தனித்தனியாகப் பிரித்து, அதிலுள்ள நடு நரம்புகளை நீக்கி, தேவையான அளவில் கத்தரித்து உலர்த்தி, நன்றாகக் காய்ந்த பிறகு அவற்றை தண்ணீர் அல்லது பாலில் போட்டு  வேகவைப்பார்கள். இப்படி நீரில் கொதிக்க வைக்கப்படுவதால் ஏடுகளில் இளக்கம் ஏற்படும். 
அப்படி துவண்ட நிலையில் இருக்கும் ஓலைகளை எடுத்து மீண்டும் காயவைத்து, காய்ந்தபின்  கனமான சங்கு  அல்லது மழுமழுப்பான கல்லினால்  அந்த ஓலைகளை நன்றாகத் தேய்த்து பளளப்பான தகடுகள் போல ஆக்குவார்கள். அப்போதுதான் ஏடுகளில் ஆணி கொண்டு எழுத முடியும். (ஆவியில் வேகவைத்தும், ஈரமணலில் புதைத்து வைத்தும் கூட ஓலைகள் பதப்படுத்தியிருக்கிறார்கள்)
பதப்படுத்திய சுவடிகளின் ஒரு ஓரத்தில் நூல் நுழையும் அளவிற்கு ஒன்றோ இரண்டோ துளைகளை இட்டு,  அவற்றை நூலின் மூலம் கட்டி வைப்பர். 
இப்படிப் பதப்படுத்தப்பட்ட ஓலைகளில் எழுத்தாணி கொண்டு எழுதும்போது, அந்த ஓலை எழுத்துவதற்குத் தகுதியானதுதானா என்று சோதனை செய்ய "உ" என்ற எழுத்தும் அதன் கீழ் ஒரு கோடும் போட்டு அதன் தரத்தை உறுதி செய்வார். 
காரணம், தமிழ் எழுத்துக்கள் சுழி, கோடு  ஆகியவற்றை அடிப்படையாகக் கொண்டது. (விளக்கம் தேவையில்லை என நினைக்கிறன்)
அப்படி சோதிக்கும் போது சரியாகப் பதப்படாமல் இருக்கும் ஓலைகள் சுழிக்கும்போதோ கோடு கிழிக்கும்போதோ கிழிந்துவிடும் அல்லது துளை ஏற்பட்டு விடும். அப்படிக் கிழிந்தாலோ துளை பட்டாலோ  அந்த ஓலைச்சுவடியை எறிந்துவிட்டு எழுதத் தகுந்த பதத்தில் உள்ள ஓலைகளில் எழுதுவார். அதற்குத்தான் அந்த "உ" அதன் கீழ் ஒரு கோடு போட்டது. இது ஓலைச்சுவடியைச் சோதிக்க நம் முன்னோர்கள் கையாண்ட முறை. 
ஆனால் அந்த சுழிக்கு பிள்ளையார் சுழி என்று பெயர் வைக்க எவ்வளவு பாடு பட்டிருக்கிறார்கள் பார்ப்பனர்கள் என்பதை நினைத்தால் பாவமாகதான் இருக்கிறது. 
தெய்வத்தின் குரலில் மஹா பெரியவா பிள்ளையார் சுழிக்கு சொல்லும் காரணம் படிக்கும்போது தலை சுற்றுகிறது.
அவர் சொல்வது இதுதான்: - 
சுழி என்பது வளைசல்; ‘வக்ரம்’ என்பார்கள். பிள்ளையாரின் தும்பிக்கை நுனி வளைந்து சுருட்டிக் கொண்டிருக்கிறது. அதனால் ‘வக்ரதுண்டர்’ என்றே அவருக்கு ஒரு பேர். பிள்ளையார் சுழி போடுவதில் பாதியாக இருக்கிற வளைசல் பூர்ணமாகிவிட்டால் முழு வட்டம். பூலோகமும், பல லோகங்களும், நக்ஷத்ர மண்டலங்கள் அடங்கியுள்ள பிரம்மாண்டமும் எல்லாமே வட்டமானவைதான். ‘அண்டம்’ என்றாலே முட்டை என்றுதான் அர்த்தம். முட்டை வட்ட வடிவந்தானே?(அப்படியா சாமீ….?) 
வளைசலான கொம்போடு ஆரம்பிக்கிற பிள்ளையார் சுழி, கொஞ்சம்கூட வளையாத நேர்கோட்டோடு முடிகிறது. பிள்ளையார் பூர்ணம், சூன்யம் இரண்டுமாக ஆனாற்போலவே வக்ரமானதும் அவர்தான், ஆர்ஜவமானதும் [நேரானதும்] அவர்தான் என்பது தாத்பரியம். வக்ர குணத்துக்கு நேரெதிரானதை ஆர்ஜவம் என்பார்கள். தமிழில் இதைத்தான் நேர்மை என்பது.
‘உ’ என்பது ப்ரணவத்தின் இரண்டாவதான நடு அக்ஷரம். அ-உ-ம என்ற மூன்றும் சேர்ந்தே ‘ஓம்’காரமான ப்ரணவம். விஷயம் தெரிந்தவர்கள் இதை இங்கிலீஷில் Om என்று எழுதாமல் Aum என்றே எழுதுவார்கள். ‘அ’ என்பது ஸ்ருஷ்டி; பிரம்மா. ‘உ’ என்பது பரிபாலனம்; விஷ்ணு. ‘ம’ ஸம்ஹாரம்; ஈச்வரன். த்ரிமூர்த்திகளும் தோன்றியது ஏக பராசக்தியால்தான். அதனால் அவள் ப்ரணவ ஸ்வரூபிணி. ஆனாலும் ஓம் ஐ தேவீ ப்ரணவம் என்று சொல்வதில்லை. ‘உமா’ என்பதே தேவீ ப்ரணவம் என்பார்கள். அ-உ-ம என்ற சப்தங்களே மாறி ‘உமா’ வில் உ-ம-அ என்ற இருக்கின்றன அல்லவா?
அ-உ-மவில் ஹ்ருதயம் மாதிரி நடுவேயிருப்பது ‘உ’. அதுவே கருணாமயமாகக் காப்பாற்றுகிற தேவீ ப்ரணவத்தில் ப்ரதம ஸ்தானத்திலிருக்கிறது. ப்ரணவ ஸ்வரூபப் பிள்ளையார் ‘அ’வும் ‘ம’வும் சேராமல் இந்த ‘உ’காரமாக மட்டுமே பிள்ளையார் சுழியில் இருப்பதைப் பார்க்கும்போது ஒன்று தோன்றுகிறது. அதாவது அவர் ”தாயைப் போலப் பிள்ளை” மட்டுமில்லை; தாயாருக்கும் ஒரு படி மேலே என்று தோன்றுகிறது. எப்படி?அவளும் ரக்ஷிக்கிற ‘உ’வுக்குப் பின்னாடியாவது ஸம்ஹார ‘ம’ ஸ்ருஷ்டி ‘அ’ இவற்றையும் வைத்தக் கொண்டிருக்கிறாள். ஆனால் பிள்ளையோ எப்போது பார்த்தாலும் எல்லாரையும் ரக்ஷிப்பது தவிர வேறு ஜோலியே வைத்துக்கொள்ளாத பூர்ண கருணாமூர்த்தியாக இருந்துகொண்டு ‘உ’ ஒன்றோடேயே நின்றுவிடுகிறார்.
ப்ரணவத்தில் ‘உ’ விஷ்ணுவின் ரூபம். உமாவும் விஷ்ணு ரூபிணியாக, நாராயண ஸஹோதரியாக, ‘விஷ்ணு மாயா விலாஸினி’யாக, ‘நாராயணி’ என்றே பெயர் படைத்தவளாயிருக்கிறாள். பிள்ளையாரைப்பற்றி ஸகலரும், ஸகல கார்ய ஆரம்பத்திலும் சொல்லும் ஸ்லோகத்திலும் ”சுக்லாம்பரதரம் விஷ்ணும்” என்றே வருகிறது. (இங்கே விஷ்ணு என்றால் ஸர்வ வியாபகமானவர் என்று அர்த்தம்.) ‘உ’ என்பது சிவ-சக்தி புத்ரனை விஷ்ணுவோடும் ஸம்பந்தப்படுத்தி, சைவ வைஷ்ணவத்தை ஸமரஸம் பண்ணி விடுகிறது!
வளைசலும் நேர்கோடுமாக இருக்கிற பிள்ளையார் சுழியில் நிறையத் தத்வார்த்தம் இருக்கிறது.வட்டமாகச் சுற்றுகிற ஸகலப் பிரபஞ்சத்தையும் அதற்கு ஆதார சக்தியான கோட்டையும் சேர்த்துத்தான் பிள்ளையார் சுழியில் வட்டமாகவும் நேர்கோட்டு பாகமாகவும் போடுகிறோம்.
கொம்பு, கோடு என்று இரண்டு வார்த்தைகள் சொன்னேன். வேடிக்கையாக இரண்டுமே பிள்ளையாரின் தந்தத்துக்குப் பேராயிருக்கின்றன. ‘ஏக தந்தர்’ என்பதை ‘ஒற்றைக் கொம்பன் ‘என்பார்கள்.
அவ்வை சொன்ன ‘கொடுவினை’ என்பது  ஜன்மாந்தர பாபங்களான பிராரப்த கர்மா. அந்தக் கர்மா எப்படியெப்படி நம்மைப் பழிவாங்க வேண்டும் என்று பிரம்மா நம் தலையில் எழுதியிருக்கிறாரென்று, சொல்லி, இதை பிரம்மலிபி என்பார்கள். ‘தலைச்சுழி’ என்பதும் இதைத்தான். இந்த தலைச் சுழியையும் கழித்து விடுவது பிள்ளையார் சுழி. ”கோடாயுதத்தால் கொடுவினை களைந்தே!”
தலை சுற்றியதா?.... அப்பப்பா…. நல்லவேளை எல்லோரும் கணினியில் type பண்ண ஆரம்பிச்சுட்டோம். பிள்ளையார் சுழி வழக்கொழிந்தது. 
ஆனாலும் மஹா பெரியவாளோட கற்பனைக்கு நான் ரசிகையாகி விட்டேன். 
        
- லதாராணி பூங்காவனம் 

செவ்வாய், 11 செப்டம்பர், 2018

தலித் பெண்மணியை நிர்வாணப்படுத்தி தெருவில் நடக்கவிட்டார்களா ??


இது தலித் பெண்மணி என்றும் , அவரை நிர்வாணப்படுத்தி தெருவில் நடக்கவைத்து அவரை அடிப்பவர்கள் பாஜக குண்டர்கள் என்றும் தவறான கருத்துக்கள் பரப்பப்பட்டுவருகிறது.
சம்பவம் இதுதான்.
(நடந்தது August 21)
பீகார்
மாநிலத்தில் ஆரா என்ற இடத்திலிருந்து சுமார் 25 கி.மீ தொலைவில் ரயில் தண்டவாளத்தில் பீமலேஷ் என்ற 19 வயது இளைஞர் ஒருவரின் சடலம் கண்டெடுக்கப்பட்டது. சடலம் கிடைப்பதற்கு இரண்டு நாட்களுக்கு முன்பிருந்தே அவர் காணவில்லை என்றும் குறிப்பிடப்பட்டுள்ளது. இந்த நிலையில் பிமெலேஷின் ஆண்குறியில் காயங்கள் இருந்ததைக் கண்ட அவர் உறவினர்கள், அந்த ரயில்வே தண்டவாளத்துக்கு அருகில் இருந்த ரெட் லைட் ஏரியாவில் பாலியல் தொழில் ஈடுபட்டிருக்கும் அந்தப் பெண்மணியின் மேல் சந்தேகம் ஏற்பட்டு, பீமலேஷ் கொலை செய்யப்பட்டிருக்கிறார் என்றும், அதற்கு இந்தப் பெண்மணி உடந்தை என்றும், அடித்துக் கொலை செய்துவிட்டு அந்தக் கொலையை மறைக்கவே சடலத்தை ரயில் தண்டவாளத்தில் போட்டிருப்பதாகவும் அந்தப் பெண்மணியின் மேல் சந்தேகம் கொண்டு பொதுமக்களோடு சேர்ந்து அவரை அடித்து, உடைகளைக் கிழித்து அம்மணமாக தெருவில் நடக்க விட்டு கொடுமைப்படுத்துகிறார்கள்..

ஏனென்றால்,
அங்கு பாலியல் தொழிலாளிகளுக்கு மீடியேட்டராக(மாமாக்கள்) வேலை செய்யும்  ஆட்கள் மூலமாக, கொஞ்சம் வசதி படைத்த நபர்கள் வரும்போது (அந்த மாமாக்களால்) அவர்களை மிரட்டி பணம் நகைகள் பறிப்பதும், பணத்துக்காக பலர் கொலை செய்யப்படுவதும்  அதிக அளவில் அங்கு நடந்துகொண்டிருப்பதாகச் சொல்லப்படுகிறது.  

ஆனால், இந்தச் சம்பவத்தைப் பொறுத்தவரை,  தனக்கும் அந்தக் கொலைக்கும் சம்மந்தமில்லை என்று அந்தப்பெண் கூறியும் வெறி பிடித்தவர்கள் போல 2000 ஆட்களுக்குமேல் ஒன்று திரண்டு, அங்கிருந்த கடைகளையெல்லாம் அடித்து நொறுக்கி, வன்முறையில் ஈடுபட்டு, அந்தப் பெண்மணியையும் பாஜார் வழியாகவே அடித்து இழுத்துச் செல்லும் வீடியோதான் சமூக வலைத்தளங்களில் பரவிக்கொண்டு இருக்கிறது. . 

இந்த சம்பவத்தில் போலீஸ் தரப்பில் 15 நபர்களைக் கைது செய்திருக்கிறார்கள். அதில் ஒருவர் பீகார் முதலமைச்சர் நிதிஷ் குமாரின்  ராஷ்ட்ரிய ஜனதா தள் கட்சி உறுப்பினர் என்பது குறிப்பிடத்தக்கது.

இந்தச் சம்பவம் நடந்தது சென்றமாதம். தாக்குபவர்கள் பிஜேபி என்றோ தாக்கப்படும் பெண்மணி தலித் என்றோ எங்குமே குறிப்பிடப்படடவில்லை. ஒரு பெண்ணிற்கு நடந்த அநீதி இது என்பதைக் கண்டு மனம் பதறாமல், இதை அரசியலாக்கி, பாஜக குண்டர்கள் தலித் பெண்ணை நிர்வாணப்படுத்தி தெருவில் இழுத்துச் செல்கிறார்கள் என்று பொய்ப்பிரச்சாரம் செய்யவது  மிகவும் ஆபத்தானது.



வெள்ளி, 31 ஆகஸ்ட், 2018

கலைஞருக்கு ஓர் கவிதைப் படையல் (கவிதாஞ்சலி)

Image result for karunanidhi
கலைஞரென்னும் காவியந்தான் முடிவு பெற்றது- எமது
      கண்ணிரண்டைக்  குளமாக்கி விட்டுச் சென்றது!
விலையில்லா மாணிக்கம் வீழ்ந்துவிட்டது -தமிழின்
        ஒப்பற்ற சொற்குன்றம் சாய்ந்துவிட்டது!
காரிருளைப் போக்கவந்த பேரொளியாக; அந்தக்
       கருஞ்சட்டைப் பெரியாரின் வளர்ப்பில்  வந்தாய்    .
ஆரியனைப் பொசுக்கிவிடும்   அக்கினிப் பிழம்பை; உன்
       ஆட்காட்டி விரல்வழியே ஒழுகச் செய்தாய்!    

திருக்குறள், தொல் காப்பியத்தைப்  புதுக்கித் தந்து
      தித்திக்கும் இலக்கியத் தேன் பருகத் தந்தாய் 
மறத்தமிழைப் போற்றிய மாப்புலவருக் கெல்லாம்
       மறக்காது சிலைவைக்கும்   மாண்பும் கொண்டாய்   .

ஆர்ப்பரிக்கும் அலைநடுவில் வள்ளுவன் சிலையும்
       அறிவூட்டும் நூலகமும் அண்ணா நினைவும்   
சீர்மிக்க  குலப்பெருமை சாற்றிடும் பல்லோர்
   சிலையோடு, செம்மொழியும் உன்பேர் சொல்லும்! 

பெண்கல்வி, சொத்துரிமை, விவசாயம் மின்சாரம்
       பேருந்து ஓய்வூதியம் உழவருக்குத் தனிச்சந்தை
எண்ணற்ற சாதனைகள் செய்திட்ட செயல்வீரா!  
          என்னாலே ஏலுமோ உன்புகழை எடுத்தியம்ப?

திருநங்கை, மாற்றுத் திறனாளி எனப்புதிதாய்
        அருந்தமிழில் பெயர்சூட்டி  அழைக்கச் செய்தாய்  
பெருநம்பிக்கை அவரிடத்து முளைக்கச் செய்து; புதுப் 
     பொலிவுடனே அவர்வாழ வழியும் செய்தாய்!

மலமள்ளும் மனிதருக்கு மறுவாழ்வும் தந்து 
      உலையரிசி கொடுத்து  வயிர்நிறையச் செய்தாய் 
பலகாலம் பட்டியலில் அடைந்தோர் வாழ்வின்
       பாதுகாப்பை உறுதிசெய்யப் பங்கும்  தந்தாய்.

திறமுரைக்கும் இராவணனின் காப்பிய நூலைச்
           சிறையிட்ட செயல்கண்டு சீற்றம் கொண்டாய்; அந்த  
அறமுரைக்கும் பெருநூலை மீட்டுத் தந்து;நம்  
           ஆதிகுடிப் பெருமைகளைக் முழங்கச்  செய்தாய்!

ஆலயத்துள் அமர்ந்திருக்கும் சிலைகள் தொட்டு  
          அனைவருமே அர்ச்சிக்க வேண்டும் என்ற 
காலங்கள் முன்கண்ட பெரியார் கனவை ;
      கல்லறைக்குள் செல்லுமுன் நிறையக் கண்டாய்! 

எண்பதாண்டுப் பொதுவாழ்வில் வலம்வந்த பேரரசே;
அண்ணாவின் இதயத்தில் இடம்பிடித்த போர்முரசே!

நுனிநாக்கில் முத்தமிழைச் சிறைவைத்த பெருந்தகையே!
இணையற்ற தமிழ்மகனே!  இறவாத பெரும்புகழே
! திராவிடர்கள் காவலனே!  தூயதமிழ்க்  காதலனே!
உடன்பிறப்பைத் தவிக்கவிட்டு விடைபெற்றுச் சென்றதுஏன்?
நீதந்த பயன்உண்ட தேனீக்கள் அத்தனையும்
"வா!தலைவா" என்றழைத்த ரீங்காரம்  கேட்கலையோ ?
காதுகளை மோதலையோ ? கையிரண்டைத் தீண்டலையோ ?
நாசியினைத் துளைக்களையோ? நரம்பேதும் புடைக்கலையோ ?

திடம்கொண்டு நூறாண்டைக் கடந்திடுவேன் என்றாயே
திடுமென்றுத் தடம்மாறிச் சாய்ந்தாயே எதனாலே?
இடையினிலே தமிழன்னை 'இங்குவா' என்றாளோ?
தடையின்றி அவளழைப்பைத் தலையாலே  கொண்டாயோ?
விடைபெற்று வாவென்று கரம்பற்றிக் கொண்டாளோ
விழிமூட வைத்துஅவள் விழிநனைந்து நின்றாளோ?
நளிதமிழில் நடனமிடும் நகைச்சுவையின் நல்விருந்தே!
நலம்பெற்று வாராது  நிலம்பெற்றுப் போனாயே! தாயாகிக் காத்துவந்த  ஓய்வறியாச் சூரியனே!
ஓயாது உன்நினைவு, ஒருபோதும் சாயாது! உன்கனவு!நீ
விட்டபணி தொடர்ந்திடவும் தொட்டபணி முடித்திடவும்
ஒட்டுமொத்த உடன்பிறப்பும் ஒன்றிணைந்து நின்கின்றோம்!
வென்றுவந்து உனை அடைவோம்!

வாழிய  உன்புகழ்! வாழிய செந்தமிழ்! 


- கவிஞர். லதாராணி பூங்காவனம் .


.

வியாழன், 2 ஆகஸ்ட், 2018

தாய்ப்பால் விழிப்புணர்வும் ஆபாசப் படங்களும்



                                    

ஆகஸ்ட் 1 - தாய்ப்பால் தினம்.

தாய்ப்பால் கொடுப்பதின் முக்கியத்துவத்தை இளம் தாய்மார்களுக்கு உணர்த்துவதாக சமூக வலைத்தளங்களில் நேற்றுமுதல் பல புகைப்படங்கள் வெளியாகி , அதிலும் குறிப்பாக நடிகை கஸ்தூரியின் புகைப்படம் பெருமளவில் ஆராதிக்கப்பட்டுக்கொண்டிருக்கிறது. 

பெற்ற குழந்தைக்கு தாய்ப்பால் கொடுக்க விழிப்புணர்வுப் படமாம். 

இதைத் தவறு என்று  விமர்சிக்கும் பெண்கள் மீது, தங்கள் மீது இந்தச் சமுதாயம் இழிவான பார்வையைப் பார்த்துவிடக்கூடாதே என்பதற்காக இப்படிப்பட்ட படங்களை ஏற்றுக்கொள்ளாமல் எதிர்க்கிறார்கள் என்று விமர்சனம் வேறு. 

இதைவிட ஆண்களின் நிலைதான் மோசம். 

இப்படிப்பட்ட புகைப்படங்களை போட்டுவிட்டு, நாங்கள் யாரும் தவறான கண்ணோட்டத்தில் பார்க்கவில்லை அல்லது பார்க்க மாட்டோம் என்று ஆண்களை வலுக்கட்டாயமாக சொல்லவைப்பது, அவர்கள் முகத்தில்  நல்லவர்கள் என்ற முகமூடியை அணிவிக்கும் முயற்சியைத் தவிர வேறென்ன? 

அடிப்படையான ஒன்றை மட்டும் புரிந்துகொண்டால் போதும். 

தாய்ப்பால் என்பது முக்கியமானது. அதை, தான் பெற்ற குழந்தைக்குக் கொடுப்பது ஒவ்வொரு பாலூட்டியின் கடமை.
தாய்ப்பாலில் ஒரு குழந்தை வளர்வதற்குத் தேவையான அனைத்துச் சத்துக்களும் இருப்பது மட்டுமன்றி குழந்தைகளை நோய் தாக்காமல் காப்பதற்கும் தாய்ப்பாலே சரியான உணவு என்பதை உணரவைத்து இளம் தாய்மார்களை தங்கள் குழந்தைகளுக்குத் தாய்ப்பால் ஊட்டுவதின் அவசியம் குறித்து  சொல்லவேண்டுமே தவிர கஸ்தூரி போன்று மார்பகத்தை அப்படியே(அதுவும் இரண்டையும்) காட்டிக்கொண்டுதான் தாய்ப்பாலின் முக்கியத்துவத்தை உணர்த்த வேண்டும் என்பது இல்லை.

எந்த வீட்டில் பெண் இரண்டு மார்பகங்களையும் திறந்து போட்டுக்கொண்டு குழந்தைக்குப் பால் கொடுத்துக்கொண்டிருக்கிறாள்? (உலகத்தில் எந்த இடத்திலும் நடக்காத விந்தை இது) 


மார்பகங்கள் என்பது,

 "ஆண்களின் உணர்ச்சியைத் தூண்டக்கூடியவைதான்". 

நாங்கள் திறந்த மார்பகங்களோடு இப்படித்தான் பாலூட்டுவோம் ஆனால் ஆண்கள் அதை புனிதமாகக் கருத வேண்டும் என்பது தவறு. 

இதில் புனிதம் புண்ணாக்கு என்ற எதுவும் இல்லை. குழந்தையின் வளர்ச்சிக்கும், சுரக்கும் பாலை, குழந்தைக்குக் கொடுக்காமல் அழகு கெட்டுவிடும் என்ற பொய்யான தகவல்களை உண்மையென்று நம்பி பால் கொடுக்க மறுப்பதால், மார்பில் "பால் கட்டு" முதல் "புற்றுநோய்" வரை ஏற்படும் அபாயம் உண்டு என்பதை விளக்கி,  குழந்தைக்கு மட்டுமல்லாது தாயின் உடல்நலத்திற்கும், தாய்ப்பால் ஊட்டுவது அவசியமானது என்பதை புரிய வைக்கவேண்டும் .


இரண்டு மணி நேரத்திற்கு ஒருமுறையோ,மூன்று மணி நேரத்திற்கு ஒருமுறையோ குழந்தைக்குப் பால் கொடுக்க வேண்டும் என்ற நிலையில்
பாலூட்டும் பெண் 24 மணி நேரமும் என் மார்பகத்தில் என் குழந்தை குடிப்பதற்கான பால் தான் இருக்கிறது என்று தாய்மை உணர்வோடே அதைத் திறந்து வைத்து இருக்க முடியுமா?  இல்லைதானே?  மறைத்துதானே வைத்திருக்கிறாள்? ஏன்? இப்படி இருப்பதுதான் நாகரீக வளர்ச்சி. 

குழந்தைக்குப் பால் கொடுக்கும் நேரம் தவிர்த்த மற்ற நேரங்களில் அவளும் சாதாரண பெண் தான். பால் கொடுக்கும் காலமான, கிட்டத்தட்ட 6 மாதம் முதல் ஒரு வருடம் வரை உடலுறவில் ஈடுபடாமல் எப்போதும் தாய்மை உணர்விலேவா இருக்கிறாள்? இல்லையே. அதனால் பால் கொடுக்கும் நேரத்தில் மட்டும் வேண்டுமானால் அவள் மீதான எண்ணம் மாறுபட்டிருக்கலாம்? அதற்குப் பிறகு….? 

ஒரு வேளை, கஸ்தூரி போல் மார்பகங்களைத் திறந்து போட்டுக்கொண்டு பால் கொடுக்கும் தாய்மார்களைப் ஆண்கள் நேரில் பார்க்க நேர்ந்தால், ஒரு சிலர் நாகரீகம் கருதி தங்கள் முகத்தைத் திருப்பிக்கொள்வார்களே தவிர  எல்லா ஆண்களும் அப்படி இருக்க மாட்டார்கள். சிறிதளவாவது மாறுபட்ட எண்ணம் எழத்தான் செய்யும் 

படம் போட்டு கதை சொல்லு…  என்னும் அளவிற்கு படிக்காதவர்கள் அதிகம் இல்லை தற்காலத்தில்.  பல கிராமங்களில் படிக்காதவர்கள் உண்டு என்று உடனே நினைப்பவர்களுக்குச் சொல்கிறேன், கிராமங்களில் நாகரீகத்தைக் கடைபிடித்துக்கொண்டுதான் இருக்கிறார்கள். ஒரு டவல் அல்லது துப்பட்டா போட்டு மறைத்துக்கொண்டுதான் எல்லாத் தா
ய்மார்களும் குழந்தைகளுக்குப்  பாலூட்டிக்கொண்டிருக்கிறார்கள்.

ஆனால், நாகரீக வளர்ச்சியடைந்ததாகக் கூறிக்கொண்டு, பெண் உரிமை , பெண்ணீயம் என்று பேசிக்கொண்டிருப்பவர்கள்தான், இப்படிப்பட்ட தவறான செயல்களை ஊக்குவித்துக்கொண்டிருக்கிறார்கள்.

இப்படிப்பட்ட தவறுகளை ஆராதித்துக்கொண்டே ஒன்றை கவனிக்கத்  தவறி விடுகிறார்கள்.

மார்பகத்தைத் திறந்து போட்டுக்கொண்டிருப்பது உன் விருப்பமென்றால், ஆபத்து உனக்கு மட்டுமல்ல, ஒன்றுமறியாத பிஞ்சுக் குழந்தைகளுக்கும் தான் . … 

ஆம், இப்படிப்பட்ட படங்களைப் பார்த்துத் தூண்டப்பட்டவர்களால்  தான் , ஏதும் அறியாத  2 வயது பெண்குழந்தைகள் முதல் ஏதும் இயலாத 105 வயது மூதாட்டி வரை காமப் பசிக்கு இரையாக்கப்படுகிறார்கள் 

இப்படிப்பட்ட படங்களின் தூண்டுதலினால் தான் சிறார்கள் குற்றவாளிகளாக மாற்றப்படுகிறார்கள்.  

உண்மையைச் சொல்லுங்கள், கஸ்தூரியின் இரண்டாவது படத்தில் … மார்பகத்தின் அந்த வெளிப்பாடு எதற்கு?  இதைப் பார்க்கும் பெண்களுக்கு தாய்ப்பால் கொடுக்க வேண்டும் என்ற விழிப்புணர்வு வருமா? அவள் மீது அருவெறுப்பு தான் வரும். 

அழுத்தமாகச் சொல்கிறேன் …"குழந்தைக்கு வயிற்றுப் பசியாற்றிக் கொண்டே பிற ஆண்களுக்கு உடற்பசியைத் தூண்டுபவள் குற்றவாளியே. அவள் தாயே அல்ல."

- லதாராணி பூங்காவனம்